Requinta
| Requinta | |
|---|---|
 O artesán de requintas Oli Xiráldez. | |
| Información | |
| Clasificación | vento madeira |
| Instrumentos relacionados | |
A requinta é un tipo de frauta travesa típica de Galicia, máis especificamente das Terras do Ulla.
Orixe[editar | editar a fonte]
A requinta apareceu en Galicia a comezos do século XIX como instrumento de acompañamento da gaita galega. Adoitaba tocarse en conxuntos denominados "gaitas" ou "requintas", principalmente nas terras do tramo medio do río Ulla.[1] Existen diversas hipóteses sobre a súa orixe, a súa chegada coas tropas napoleónicas durante a francesada, unha modificación local ideada para os músicos da catedral de Santiago, a introdución por algún peregrino a Santiago etc. É case seguro que o instrumento como hoxe se coñece fose conformado no obradoiro dos García de Riobó[2], pois del saíron a práctica totalidade das requintas conservadas.[3]
Características[editar | editar a fonte]
O son da requinta prodúcese unha oitava por riba do da gaita, e deste feito deriva o seu nome, pois os gaiteiros chaman “requintear” a tocar na oitava máis aguda do seu instrumento.[4] A súa principal afinación é o fa#, para poderen acompañar as gaitas afinadas en Si natural, existindo tamén as afinadas en Sol, para o acompañamento de gaitas en Do.
A construción das requintas é artesanal, e a madeira empregada adoita se-lo buxo, aínda que non é infrecuente atopalas noutras madeiras nobres, como o granadillo, ou doutras moito máis cativas como a hedra. Está composta de cinco pezas aneladas en alpaca, latón, ou ás veces en prata. A primeira peza leva a embocadura e a rosca de afinación, e a derradeira adoita levar unha chave que aumenta o cromatismo do instrumento, e resulta fundamental para afina-las notas na terceira oitava.[1]
No ano 2017, publicouse un libro-cd que reúne en máis de 80 partituras transcritas, o primeiro cancioneiro de música do repertorio dos grupos tradicionais que empregaban nas súas formacións a requinta da Ulla, traballo feito por Rafael Carracedo Crespo na editorial Embora e coa colaboración da Secretaría Xeral de Cultura da Xunta de Galicia.[5]
Notas[editar | editar a fonte]
- ↑ 1,0 1,1 Carpintero Arias, Pablo. "Requinta". Os Instrumentos Musicais na Tradición Galega. Consultado o 2021-07-07.
- ↑ "Obradoiro Garcia Riobó". Consultado o 2021-07-12.
- ↑ "O son da requinta". Raiceiros.org. Consultado o 2021-07-12.
- ↑ "Clases requinta gallega, la flauta travesera del folclore de Galicia". A Píntega Marela (en castelán). 2018-05-16. Consultado o 2021-07-07.
- ↑ "La música de la requinta da Ulla tiene quien la escriba". La Voz de Galicia (en castelán). 2017-12-26. Consultado o 2021-07-07.
Véxase tamén[editar | editar a fonte]
Bibliografía[editar | editar a fonte]
- Carpintero Arias, Pablo (2010). Os Instrumentos musicais na tradición galega. Difusora de Letras, artes. ISBN 8492958057.
Ligazóns externas[editar | editar a fonte]
- Requinta- Concerto didáctico de Pablo Carpintero. UvigoTV. (2008).
- A requinta de Avelino Marta - Canle de vídeos da Secretaría Xeral de Política Lingüística. Youtube (2021).
