User:មុនីវ័ន្ត
កងទ័ពខ្មែរ-ថៃបន្តប្រយុទ្ធគ្នាបន្ទាប់ពីចុះកិច្ចព្រមព្រៀងឈប់បាញ់ ដោយ អ៊ួន ឈិន និង សេក បណ្ឌិត 2011-04-29
ការវាយប្រយុទ្ធគ្នារវាងកងទ័ពកម្ពុជា-ថៃ នៅតំបន់ព្រំដែននៅតែបន្ត បើទោះបីជាមេទ័ពនៃប្រទេសទាំងពីរបានជួបចរចាគ្នាឲ្យមានការ ឈប់បាញ់កាលពីថ្ងៃទី២៨ មេសា យ៉ាងណាក៏ដោយ។
RFA/Uon Chhin
មេបញ្ជាការកងទ័ពកម្ពុជានៅសមរភូមិជួរ មុខប្រចាំទិសទី៣ ឧត្តរមានជ័យ កំពុងពិនិត្យផែនទីយុទ្ធសាស្ត្រ ខណៈការប្រយុទ្ធគ្នានៅតំបន់ប្រាសាទតាមាន់កំពុងតែបន្ត។ ថតនៅថ្ងៃទី២៤ ខែមេសា ឆ្នាំ២០១១។
មន្ត្រីកងកម្លាំងយោធាកម្ពុជា ប្រចាំសមរភូមិជួរមុខ បានថ្លែងនៅថ្ងៃទី២៩ ខែមេសា ថា បទឈប់បាញ់ត្រូវបានរំលោភដោយភាគីថៃ។ នេះមិនមែនជាលើកទីមួយទេដែលភាគីថៃ បានរំលោភលើកិច្ចព្រមព្រៀងឈប់បាញ់នេះ។
ប្រភពមន្ត្រីយោធាសមរភូមិជួរមុខតាមខ្សែបន្ទាត់ព្រំដែន នៅតំបន់ប្រាសាទតាមាន់ និងប្រាសាទតាក្របី បានឲ្យដឹងថា ភាគីថៃបានរំលោភកិច្ចព្រមព្រៀងឈប់បាញ់គ្នារវាងកម្ពុជា និងថៃ កាលពីរសៀលថ្ងៃទី២៨ ខែមេសា ដោយថៃបានបន្តបាញ់រប៉េះរប៉ោះតាមបណ្ដោយព្រំដែនក្បែរប្រាសាទ តាមាន់ធំ និងប្រាសាទតាក្របី ចាប់ពីម៉ោង ៨ និង ៣០នាទីយប់ ថ្ងៃទី២៨ ខែមេសា។
លុះដល់ម៉ោង ៥ព្រឹកថ្ងៃទី២៩ ខែមេសា ភាគីថៃបានបើកការបាញ់ប្រហារមកលើភាគីកម្ពុជា ដោយកងថ្មើរជើងប្រើអាវុធធុនស្រាល ដូចជា B40 និង DK82 ជាដើម ហើយភាគីកម្ពុជា ក៏បានប្រើសិទ្ធិបាញ់តបតវិញ។ ការប៉ះទង្គិចគ្នាបានបន្តរហូតដល់ម៉ោង ៦ព្រឹក ថ្ងៃទី២៩ ខែមេសា។
មន្ត្រីយោធាដដែលបានអះអាងថា ការប្រយុទ្ធគ្នាអស់រយៈពេលមួយម៉ោងនេះ បណ្ដាលឲ្យកងកម្លាំងនៃអង្គភាព ២៦០៦ឈុតខ្មៅថៃ ម្នាក់ស្លាប់ និង ៤នាក់រងរបួស ចំណែកឯខាងភាគីកម្ពុជា ពុំមានកងទ័ពស្លាប់ ឬរងរបួសឡើយ៕