鳩嗚

鳩嗚（粵拼：gau1 wu1）字面意思係解「亂咁嗌」，2014年開始喺香港用來做普通話詞「購物」（漢語拼音：gòuwù）嘅粵語音譯，有嘲諷意味。

典故

2014年8月17號，香港保普選反佔中大聯盟搞8.17反佔中大遊行，有記者訪問參加者遊行目的，參加者用普通話答「購物」，訪問片喺網上廣泛流傳，啲網民將佢寫成「鳩嗚」嘲諷。

發展

2014年9月底爆發雨遮革命，民眾佔領香港幾個地方嘅馬路，到11月底警方到旺角清場，特首梁振英跟住呼籲市民到旺角消費支持商舖，佔領民眾就諗到用「鳩嗚」名義逗留喺旺角嘅行人路週圍行，變相繼續佔領。