User:Bongva

Dawtmi u le nau hna

Bible Pathian bia hi thuk deuh in ruah le kau deuh in cuanh khawh hi zumtu caah thathnemnak tampi a um ko lai tiah ka ruah ko.Kei hi Bible ka rel ah Tv zoh bantuk khin ka thinlung thlam ah a cuang i thil a rak can lio ah an pawng teah a um bantuk khi ka si.Nan si ve cio dek maw?.

Khrihfa zumhnak hi khrih chung i aa bunhmi a si i Khrih nih hin Bible ah a kan ton i bia a kan ruah.Khrihfa zumhnak hi Bible zumhnak a si i a tthawng i a tthang chin lengmang i Pathian sunparnak kha zumtu hna nun ah a lang.Dr Rev Van Bik nih cun Bible a hramthok in a dongh tiang ah suihri (golden thread) pakhat aa zammi cu khamhnak tuanbia hi a si a ti.Khamh kan sinak hi Pathian VEL thawngin a si.Efesa 2:5 A nawl kan ngaih lo ruang i thlarau lei in kan thih ko lioah khan Khrih sinah cun a kan nunter. Khamh nan sinak cu Pathian vel thawngin a si.Nannih cu vel an ngeih hna caah an khamh hna i khamhnak nan hmuh cu amah nan zumhnak thawngin a si. Khamhnak nan hmuhmi cu nanmah tuahmi a si lo, Pathian laksawng a si.Titas 2:11 Zeicahtiah Pathian nih a vel cu mi vialte khamhnak caah a phuan cang, (Titas 3:7)cucaah a vel ruangah Pathian he cun kan i rem i kan i ruahchanmi zungzal nunnak kha kan hmuh.Cu suihri a sunglawituk mi Pathian VEL khamnak kong hi i ruah lengmang ko hna u sih.

Biakam hlun cauk hna chungah raithawinak kan humhmi saram thisen in raithawinak dihlak hi Jesuh Khrih nih Kalvary tlang i vawlei misual vialte kan caah a thletmi thisen raithawinak kha hmelchunhnak in rak langhter chungmi an si.Cucu suihri khamhnak tuanbia kan timi cu a si. Efesa 1:4 "Vawlei a ser hlan in Pathian nih kannih cu Khrih chung i amah ta si dingin a kan thim cang". 1Peter 1:20 Amah cu Pathian nih vawlei a ser hlan khan a thim cang i nanmah caah hi ni hmanung bik hna caan ah hin a hun langhter.Genesis cauk chungah Pathian VEL a langhnak hmun tampi ah hmuh khawh a si.Sualnak burbuk phen kan i thuh lio ah akan kawltu cu kan Pathian a si.Gen 3:9 Sihmanhsehlaw Bawipa Pathian nih cun mipa cu a vun auh i, “Khuazei ah dah na um?” tiah a ti. Saphaw hnipuan a ser piak hna.

Biakam hlun cauk 39 chungah Moses cauk panga kan timi; Phundang in Nawlbia (Torah) ti zong in auhmi - Gen ,Exo , Levi ,Nam le Deu( a tawinak in ka tial hna) hi Bc 400 ah rak cohlanmi an si.Ahmasa bik Bible ah rak khumh mi an si. Cu hnu in a dang cauk hna kha a dot dot tein an van khumh hna.Genesis cauk chungah raithawinak le thisen kong hi ruah tti hna usih ti ka duh. Bible chungah tial a si lomi kong a si lai.Cu cu thuk deuh le kau deuh in cuanh ka timi kha a si.Genesis 3:21 Cun Bawipa Pathian nih Adam le a nupi cu saphaw hnipuan a serpiak hna i a aihter hna. Hika ah raithawinak tiah kan hmu lo nain Saphaw cu kan hmuh. Saphaw hnipuan sernak dingah ramsa kha thah i a phaw kha hnipuan ah ser khi a si hnga.Genesis 2.19 ah saram an dihlak le va an dihlak a sernak kan hmuh.Ramsa phun tampi an rak um ko caah cu saram hna cu thah i saphaw hnipuan cu ser si sehlaw aa tlak ngai ko hnga. Vancung in thlak dawh phun cun Saphaw cu vancungah a um lai ka zum lo.A um lomi kha Pathian nih Saphaw hnipuan chuak tuah tiah nawlpek in a ser lai zong ka zum fawn lo.(Pathian cu a um lomi umter khotu a si cu ka zumh ko)Israel mirun tampi ramcar ah ti a umlo nak ah lungpi chung in ti a pek ko hna.Saphaw hnipuan ser awk ah saphaw thatha an um ko lai tiah ka zumh.Saram nung thah ahcun thisen cu a chuah hrimhrim a herh ve hnga.Cu thisen nih a vun chuah pimi saphaw cun minu le mipa an ningzahnak thiam lo an cannak Pathian hmai ah an sual ningzahnak cu lang loin khuh piak an si ko tiah ruah awk in a um.Saphaw hnipuan ahhin Pathian dawtnak minung cungah a lang ko ti khawh a si.Dawtnak Pathian nih minung kan cungah thisen hmang in sual ningzahnak hi a rak kan khuh piak ko, akan maimilh piak ko tikha ruah lo awk a tha lo.

Genesis 3:7 ah theipi hnah kha an i thit i an i hruk tiah kann hmuh.Hika zawn tehi minung leikap in kan ningzahnak kha kan i khuh piak ve,kan i maimilh ve .Asinain Pathian hmaika ah a tling lo,cohlan tlak a si lo.A lianngan mi vel le zaangfahnak ruangah amah Pathian leikap in,Pathian sin in a rami saphaw hnipuan tukha kan sual ningzahnak khuh piak ding le maimilh dingah a tlingmi a si.Pathian vel cu a lianngan ko. Raithawinak kan hmuh hmasa biknak cu Genesis a ngan pa 4 ah Kain le Abel an si.Raithawinak ti thengmang in a tial lo laksawng tiin a tial i Hebru 11:4 ahcun "Kain nih a pekmi raithawinak tiah a tial than ve.Noah lawng chung in a ttum ah Biaktheng a ser i saram thiang mi chungkhan khanghthawinak a tuah tiah kan hmuh(Gen 8:20)

Vawlei ser hlan in kan nih cu Khrih ta si ding in a kan thim cang. Thisen le Raithawinak kong vialte Adam chan in, Noah chan in, Abraham chan in a dotdot in rak tuah lengmang mi raithawinak thisen hna cu Suihri aa zammi Khamhnak rak langhter chungmi cu a si. Kan Bawipa Jesuh Khrih nih Kalvary tlangah amah thisen thengmang in raithawinak a tuahmi an rak hmuh chungmi a si.Ni hmanung bik ah kan nih sin ah a taktak in a hun langhter hi a si. Hebru 7:27Amah cu tlangbawi dang hna bantuk kha a si lo, amah sualnak caah siseh, midang sualnak caah siseh, ni fate in raithawinak tuah kha a herh lo. Amah le amah raithawinak i aa pek ah khan zungzal ca za in raithawinak pakhat a tuah.

Nan dihlak cungah Bawipa Jesuh vel cu um ko seh. Amen (Biathlam 22:21)

"Theih awk."... Bible chung ah ai tial lomi kha ka chap silo in Pathian VEL le a sunparnak ka langhter duhmi a si. Thuk deuh le kau deuh in ruah le rel thiam kha biapi ah ka chiah.Sunpar lianhngannak vialte Bawipa Pathian ta si ko seh.

Jonathan Thlauk