User:Ysgol pentrecelyn
Ysgol gynradd naturiol Gymraeg yw Ysgol Pentrecelyn wedi ei lleoli yn ardal wledig Pentrecelyn yn Nyffryn Clwyd. Daw plant yma o'r ardaloedd cyfagos (Llanelidan, Graigfechan, Pentrecelyn a Llandegla) i dderbyn eu haddysg.
Cymraeg yw cyfrwng y gwersi ac felly, trwy ddod i Ysgol Pentrecelyn, mae nifer helaeth o blant o gartrefi dwyieithog ac uniaith Saesneg, yn ogystal ag o gartrefi Cymraeg, wedi manteisio ar y cyfle i ehangu eu gorwelion a blasu cyfoeth dau ddiwylliant. Mae'r awyrgylch yn nodweddiadol o ysgol fechan wledig ble mae perthynas glos yn bodoli rhwng y staff, y plant a'u teuluoedd a'r gymuned leol. Addysgir pob plentyn yn unol â'i allu a'i anghenion a rhoddir cyfle i bawb i gymryd rhan yn yr holl weithgarddau, boed hynny o fewn oriau ysgol neu yn all-gyrsiol.
Caiff plant Pentrecelyn y cyfle i gymysgu gyda phlant o ysgolion cyfagos mewn gweithgareddau megis twrnamentau pêl-droed a phêl rwyd, gala nofio, mabolgampau ardal, cyrsiau preswyl yng Nglan Llyn a chystadlaethau'r Urdd. Trwy hyn, maent wedi dod yn ffrindiau â phlant o ysgolion eraill cyn iddynt symud i Ysgol Uwchradd Brynhyfryd. Nid yw gofal plant y tu allan i oriau ysgol yn broblem yma gan fod gennym Glwb Brecwast llwyddiannus sy'n agor ei ddrysau am 7.40 y bore a gall y feithrinfa ddyddiol leol, Miri Meithrin, ddod i'r ysgol i nôl plant ar ddiwedd y diwrnod i fynd i'w clwb ar ôl ysgol nhw.
Rhennir yr ysgol yn ddau ddosbarth:
Dosbarth Babanod (Meithrin, Derbyn, Blynyddoedd 1 a 2) - Mrs Delyth Jones a Mrs Eleri Perrin yw athrawon y dosbarth yma gyda help Mrs Nia Jones yn y boreau pan fo'r plant Meithrin i mewn. Gan nad oes Cylch Meithrin yn y dalgylch, caiff plant ddechrau yn Ysgol Pentrecelyn yn ystod y tymor wedi iddynt godi'n dair oed.
Dosbarth Cynradd - Mae Mrs Delyth Jones a Miss Delyth Roberts yn dysgu'r plant hynaf ar adegau gwahanol o'r wythnos ar gyfer gwahanol bynciau.