User talk:Emvee007

Mihing te social being ihi uh chih a theilou i om din ka gingta kei hi. Huaiziaktak mah in leng, Ei zomi kichi tamlou chik te, kivehtuah, ki pawttuah, Ankhing tuibuk kisawk a kikawm te ihi uh. Nopni leh dah ni a kidelh huan, a zawng a hau kikhenlou a khovel zang te ina hi uhi. Nungak leh tangval te bang leng inn lum a kihel a Iitna thu suutkhawm. Khotang leh Saptuam a lunglut mah mah te leng ina hibok uhi.

Hun te hong paitou zel in Laisiam leh mipil i hongtam chiang un, Khotang leh Saptuam pawl tuam tuam dingin, Pathian khat gindan kibang hetlou lah kituak tak in Innsak, Innpam a teng in ina khosa uhi. I gam ah zo, ami leng i kidaih ua, Saptuam hileh Pawldang dang hita leh eitel hetlouh a leng hithei ding tampueh mah hi.

Tunai chin a Lamka post a Chennai ah YPA phuh ding hong ki gelh in ka lungsim ah thiltampi honglut hi. Ka na comment ve teisam a, mun tuam tuam a ten le ana awlmoh thei chiat ihi ding ua A comment teng bang leng a news item leh sang khat phial pha ding in ka gingta hi. Zogam.com history ah len comment huaizah zah omlam ka thei naikei hi (ka theih khelh ahihleh lah ngaihsiam). A comment te sung ah YPA sang mah in le Biakna lam a pawl om te taklat tam in hong om zaw hi. YPA kichi Lamka bial sung a phattuamngai pawl lian pen leh Nasem hoih pen in ka thei a, Lusun mangbat ni bang in YPA omlou hitaleh chih khawng kana ngaihtuah mawk mawk hi. Kei mah leng Ka Pi (ka pa nu) leh ka tanau laina tamtak te Kilawm tak leh ka phulouh un zahna toh hon Vuiliam sak ban uah, Nungak leh tangval tampi te Zanhak leh Kou innkuan te hong hehnem ding in a zanhak pawl bang leng om uhi. Hiai teng khawng ka ngaihtuah kik chiang in Sum a lei di hileh ka damsung in leng ka leikhe zou kei ding in ka gingta hi. A Heutute leng a kipiak zohna uh thupitak ahi, LOH neilou a hiai bang sep di chih maizen, Thilthupi ahi ka chilou thei kei hi.

I khopi dinmun te ka et chiang in, Ngaihdan tuam tuam in hon buak a, ken ka na muh tei dan tamlou ka hon taklang nuam hi. (Kei muhdan Liau liau hong gelh sawm ka hih ziak, genkhak a om Saptuam leh Pawlpi kamuh sit ziak leng ahikei a. Huai pawlpi sung a mi ka hi chih leng ka genlang masa nuam hi. A deihlou pumlum leng ka hi tuan kei a, a lampi dang omthei diam chi nuam zaw ka hi.) Nidang khawng a Lamka khawng a School kailai khawng in, Mundang a om sepna nei te enn na leh huai te bang bang a septheih utluat na bang kinei zel hi. Bangjiak tak a ngaisang a, eng i hiam ichih chiang in, Sumtampi loh ding ua, Nuamtak a khosa ding uh, Hun awl hau ding ua, Nuamsa law ding uh khawng kisa maimah hi. A tak tak i hon muh chiang in, enhuai het lou, sumnei le uh leng hinkhua nuam innlam a i zat bang ana zang hetlou uh ahi chih kei muhsuah na ahi. Huchi kawm kal lak a Biakna ngai poimoh a I chi, I sa, Pau leh Haam khentuam lou a Biakna a pan Mi phatuamngai te Ngaihsang huai kasa mah mah hi. Amau kipiak zoh na te ziak a Pathian be thei a om ihi chih Mangngilh kei ni. Christian te I biak uh Pathian hing ahi a, Khat kia leng ahi, Vaite bang in pathian tuam tuam i nei kei ua, Eimuh dan chiat a kibia hi in ka thei hi. I biak khat thou thou ahih leh, bangjiak a Biakinn khat a biak khawm theih lou ding sa veu tak ihi di uam aw?? Ka ngaihtuah na in baan lou deuh adiam?? Kei Pathian biak in zaw ka melma te nangawn le iit dia hon sinsak hi a.. Kris a ka Unaupih leh ka Kristian pih te toh ka kikhop khawm theih kei a, amau te toh Biakna khat le ka neih theih kei leh chu, Kua ka mohsa dia? Pathian ka mohsak kei leh chu kei a mohkhin, Setan Vanzat lel (pathian thu awi lua ka kisak kal a) himai mah ding ka hi.

Gospel honglut kum 100 vel ching ding hita himahleh, I gam mial sem sem ding bang ka sa mawk hi. Mundang a Missionary tampi sawl di bang in I thum sauh sauh ua, I Biakinn a hong kikhawm ngamlou, kizuak leh meithai te pii lut utlou te kihi zomah. Hiai bang teng ihih nung in iki siamtan ngam diam? Eilawi ihih leh Saptuam sung khawng a UPA leh kizatna tuam tuam khawng i neih chiang a, khial thei di bang a kingaih tuah nawn lou in mi khawng lak a kisial hile kilawm tuk bang in Saptuam lam ana lunglut khollou te khawng pathian thu awilou in I koih sek uhi. Ka lawmte lak a zukham niia niia thei khat in Hichi'n hon chi hi. "Nang Biakinn lam manoh a na kuan chiang a Setan in nang kalsuan zah leh nih a hon delh ahi." Gennei ka sa mah mah hi. Eilawi in Pathian gamna I sep chiang un, leitung thil a muhtheih di te bang le I enlah lua uh hi in ka mu hi, huchi ahih leh chu Khemna le a tam dia, khemna ah I puklut sin ngal ding ua….. Thoh kik sang in I tuitum in, I thuklut deuh deuh khamoh na??? Gelh gelh leng le meidiil tan ki gelh tung theihleh kilawm ka sa hi.